HOT NEWS
Main menu
ဖုန်ကြားရှင် ဘာလဲ ဘယ်လဲ

ဖုန်ကြားရှင် ဘာလဲ ဘယ်လဲ

++++++++++++

ချစ်မင်းထွန်း

++++++++++++

 

၂၀၁၅ ခုနှစ် ဖေဖော်ဝါရီလအတွင်းက ဖုန်ကြားရှင် တစ်ကျော့ ပြန်ပေါ်လာခဲ့သည်။ ဖုန်ကြားရှင်၏ တစ်ကျော့ ပြန်ပေါ်လာခြင်းက တည်ငြိမ်အေးချမ်းခြင်းနှင့် မဟုတ်ဘဲ တိုက်ပွဲများဖန်တီး ခြင်းဖြင့် ပြန်ပေါ်လာခဲ့ခြင်း ဖြစ် သည်။ ဖုန်ကြားရှင် ပြန်မပေါ်လာခင်မှာဘဲ ဖုန်ကြားရှင် ပြန်ပေါ်လာမည့် အကြောင်းနှင့် တိုက်ပွဲများ ပြန်လည်ဖြစ်ပွားလာတော့မည့် အခြေအနေများအကြောင်း အရိပ်အမြွက် ထွက်ခဲ့သည်။

 

ယင်းနောက် လောက်ကိုင်၊ ချင်းရွှေဟော်၊ မုံးကိုးစသည့် ဒေသများတွင် ၂ဝ၁၅ ခုနှစ် ဖေဖော်ဝါရီ ၉ ရက်မှ မတ်လအထိ တိုက်ပွဲများ အပြင်းအထန် ဖြစ်ပွားခဲ့ရာ တပ်မတော်ဘက်မှ အရာရှိ ခုနစ်ဦး၊ စစ်သည် ၄၈ ဦး ကျဆုံးခဲ့ပြီး အရာရှိ ၁၂ ဦး၊ စစ်သည် ၉၆ ဦး ထိခိုက်ဒဏ်ရာများ ရရှိခဲ့သကဲ့သို့ MNDAA ဘက်မှ တပ်မဟာမှူးအဆင့်ရှိသူတစ်ဦး၊ အထူးတိုက်ခိုက်ရေး တပ်ရင်းမှူးအဆင့်ရှိသူ တစ်ဦးအပါအဝင် ၇၂ ဦးခန့် သေဆုံး ခဲ့ကြောင်း ညှိနှိုင်းကွပ်ကဲရေးမှူး (ကြည်း၊ ရေ၊ လေ)မှ ဗိုလ်ချုပ်ကြီး မြထွန်းဦးက ၂ဝ၁၅ ခုနှစ်မှာပဲ လောက်ကိုင် တိုက်ပွဲအခြေအနေကို သတင်းမီဒီယာများနှင့် တွေ့ဆုံစဉ် ပြောကြားခဲ့သည်။


ဖုန်ကြားရှင်၏ လက်နက်ကိုင် လှုပ်ရှားမှု သမိုင်း

၁၉၅၈ ခုနှစ် အိမ်စောင့်အစိုးရ တက်လာပြီးနောက် စော်ဘွားများ အာဏာစွန့်လွှတ်ရေး ဆောင်ရွက်ခဲ့ရာ ကျေနပ်မှုမရှိ၍ ကိုးကန့်စော်ဘွား၏သား ဂျင်မီယန်းသည် ကိုးကန့်ကာကွယ်ရေးတပ်အချို့ကို ဦးဆောင်ကာ ထိုင်း-မြန်မာနယ်စပ်သို့ ထွက်ခွာသွားခဲ့ပြီး ကျန်ရှိသော ကိုးကန့်ကာကွယ် ရေးတပ်များအား ဖုန်ကြားရှင်က ဦးစီးလှုပ်ရှားခဲ့သည်။ ထိုအဖွဲ့သည် ကူမင်တန်(တရုတ် ဖြူ)၊ ဗကပတို့နှင့် ဆက်သွယ်မှုများ ပြုလုပ်၍ အထောက်အပံ့များ ရယူခဲ့ခြင်းကြောင့် တပ်မတော်စစ်ကြောင်းများက ၁၉၆၃ ခုနှစ်တွင် စတင်တိုက်ခိုက်ခဲ့ရာ ဖုန်ကြားရှင်မှ တစ်ဖက်နိုင်ငံသို့ ထွက်ပြေးတိမ်းရှောင်ခဲ့ ပြီးနောက် ၁၉၆၇ ခုနှစ်အရောက် ဗကပ၏ စည်းရုံး သိမ်းသွင်းမှုဖြင့် ဖုန်ကြားရှင်မှာ ဗကပဘက်သို့ ကူးပြောင်းခဲ့သည်။


၁၉၈၉ ခုနှစ် ဧပြီလအတွင်းမှာတော့ ဖုန်ကြားရှင်၊ ဖုန်ကြားဖု၊ လီနင်မင်တို့ ဦးစီးသော ကိုးကန့်အဖွဲ့က ပုန်ကန်မှုများ ပြုလုပ်ခဲ့ရာ ယင်းနောက် 'ဝ'တိုင်းရင်းသား လက်နက်ကိုင်အဖွဲ့ကို ကျောက်ညီလိုင်နှင့် ပေါက်ယူချန်း တို့က ဦးစီး၍ ထပ်မံပုန်ကန်မှုများ ပြုလုပ်လာခဲ့ခြင်းကြောင့် ဗကပကျဆုံးခဲ့ပြီး တစ်ဆက်တည်းမှာပဲ ဖုန်ကြားရှင်သည် MNDAA (မြန်မာအမျိုးသားဒီမိုကရက်တစ် မဟာမိတ်တပ်မတော်)ကို ထူထောင်၍ မုံး ကိုး၊ လောက်ကိုင် ဒေသတို့ကို ထိန်းချုပ်ခဲ့သည်။ တစ်ချိန်တည်းမှာပဲ MNDAA ၏ တပ်ဖွဲ့ဝင်အင်အား ၂၇ဝ၆ ဦးသည် လက်နက်မျိုးစုံ ၁၃၄၅ လက်ဖြင့် ဥပဒေဘောင်အတွင်း ဝင်ရောက်ခဲ့ပြီးနောက် တပ်မတော်၊ အစိုး ရနှင့် ငြိမ်းချမ်းရေးရယူကာ ရှမ်းပြည်နယ်(မြောက်ပိုင်း) အထူးဒေသ (၁) အဖွဲ့အဖြစ် ဆောင်ရွက်လာခဲ့သည်။


အထူးဒေသ(၁)နှင့် အကွဲအပြဲ

ရှမ်းပြည်နယ် (မြောက်ပိုင်း) အထူးဒေသ(၁)အဖွဲ့ ပေါ်ပေါက်လာချိန်တွင် ဖုန်ကြားရှင်ဦးစီးသည့် 'ဖုန်'အုပ်စုသည် နိုင်ငံရေးနှင့် အုပ်ချုပ်ရေးပိုင်း တာဝန်ယူပြီး ရန်မိုးလျန် ဦးစီးသော 'ရန်' အုပ်စုက စစ်ရေး၊ လုံခြုံရေး အပိုင်း တာဝန်ယူခဲ့ရာ အုပ်စုလိုက် တန်ခိုးကြီးထွားစေရေး အချင်းချင်း အာဏာလုကြခဲ့စဉ် 'ဖုန်'၊ 'ရန်'ပြဿ နာများစွာ ပေါ်ပေါက်ခဲ့ရာ တပ်မတော်မှ ရင်ကြားစေ့ ဖြေရှင်းပေးခဲ့ရကြောင်း ညှိနှိုင်း ကွပ်ကဲရေးမှူး (ကြည်း၊ရေ ၊လေ) မှ ဗိုလ်ချုပ် ကြီးမြထွန်းဦးက ၂ဝ၁၅ ခုနှစ်အတွင်းမှာ ပြောကြားထားသည်။ ၂ဝဝ၇ ခုနှစ်တွင် ဖုန်ကြားရှင်အဖွဲ့မှ ကိုးကန့်ဒေသ ရန်လုံကျိုင်းရွာ၌ လက်နက်စက်ရုံဖြင့် လက်နက်၊ ခဲယမ်းများ ထုတ်လုပ်လျက် ရှိကြောင်း တပ်မတော်မှ သတင်းရသွားခဲ့ရာ ၂ဝဝ၈ ခုနှစ် ဒီဇင်ဘာ ၂၇ ရက်မှာ လောက်ကိုင်မြို့ တုံချိန်မြို့သစ်ရုံးရှေ့ တိုက်ခန်းအမှတ်(၁၅)သို့ ဝင်ရောက်ရှာဖွေစဉ် လက်နက်၊ ခဲယမ်းများ သိမ်းဆည်းရမိခဲ့ပြီးနောက် ၂ဝဝ၉ ခုနှစ် သြဂုတ် ၂၂ ရက်၌ ဖုန်ကြားရှင်အပါအဝင် လေးဦးအား ဥပဒေနှင့် အညီ စစ်ဆေးအရေးယူနိုင်ရေးအတွက် ရဲတပ်ဖွဲ့သို့ လွှဲပြောင်းပေးရန် အကြောင်းကြားစာအား အထူးဒေသ(၁) ဗဟို ကော်မတီဝင်များ ထံ ပေးအပ်ခဲ့သော်လည်း

 

သြဂုတ် ၂၅ ရက်မှာတော့ ဖုန်ကြားရှင်သည် တောင် ညီနောင်ဘက်မှတစ်ဆင့် ဘီပီ(၁၂၅/၁၂၆)ဘက်သို့ ထွက်ပြေးတိမ်းရှောင်သွားခဲ့၍ ဖုန်ကြားရှင်၊ ဖုန်ကြားဖု၊ ဖုန်တာရွှင်တို့အား လက်နက်/မူးယစ်/သွင်းထုတ်/ပြစ် မှုဆိုင်ရာပုဒ်မများဖြင့် ဥပဒေကြောင်းအရ အမှုဖွင့်လှစ်ခဲ့ကာ တရားခံပြေးများအဖြစ် ကြေညာခဲ့ကြောင်း တပ်မတော်မှ လောက်ကိုင်ဒေသ တိုက်ပွဲများ ဖြစ်ပွားမှုနှင့်ပတ်သက်ပြီး ရှင်းပြစဉ်က ပြောကြားခဲ့သည်။ ဖုန်ကြား ရှင် ထွက်ပြေးတိမ်းရှောင်ပြီးနောက် အထူးဒေသ(၁)တွင် ခေါင်းဆောင်မှု ကင်းမဲ့သွားခြင်းကြောင့် ကိုးကန့်နယ်မြေ၏ အေးချမ်းတည်ငြိမ်မှု ဆက်လက်ထိန်းသိမ်းရန် လိုအပ်သဖြင့် ကိုးကန့်ဒေသ ယာယီ ဦးစီးကော် မတီကို ၂ဝဝ၉ ခုနှစ် သြဂုတ် ၂၅ ရက်၌ ဖွဲ့စည်းပေးခဲ့ပြီး ဦးပယ်စောက်ချိန်အား ဥက္ကဋ္ဌအဖြစ် တင်မြှောက်ခဲ့သည်။


ဖုန်ကြားရှင်နှင့် ဒေါသမီး

ကိုးကန့်ဒေသ ယာယီဦးစီးကော်မတီဖွဲ့စည်း၍ ကိုးကန့်ဒေသဥက္ကဋ္ဌအဖြစ် ဦးပယ်စောက်ချိန်အား တင်မြှောက်မှုနှင့် ပတ်သက်၍ ဖုန်ကြားရှင်မှ မနှစ်သက်သည့်အတွက် ရန်လုံကျိုင်းနယ်စပ် စစ်ဆေးရေးဂိတ်တွင် ခရိုင် ရဲတပ်ဖွဲ့မှူး အပါအဝင် ဦးစီး ၅၂ ဦးအား ဖုန်တာရွှင်တပ်များက ပိတ်ဆို့ထားခဲ့ပြီး ရဲတပ်ဖွဲ့ဝင်များ ပြန်လွှတ်ပေးရန် တာဝန်ရှိသူများက ဆက်သွယ်ခဲ့သော်လည်း စေလွတ်ပေးခြင်းမရှိရာမှ နှစ်ဖက် ပစ်ခတ်မှုများ ဖြစ်ပွား ခဲ့ရာ ရဲတပ်ဖွဲ့ဝင် ၁၄ ဦးကို ရဲစခန်း အချုပ်ခန်းအတွင်း ဖုန်ကြားရှင်အဖွဲ့မှ သတ်ဖြတ်ခဲ့ကာ သူ၏ ဒေါသ မီးကို ဖြေဖျောက်ခဲ့သည်ဟု သိရသည်။ အစိုးရဝန်ထမ်းများကို ဖုန်ကြားရှင်အဖွဲ့မှ သတ်ဖြတ်ခဲ့ခြင်း အပါအဝင် မူး ယစ်ဆေးဝါး မှောင်ခိုကူးမှုနှင့် တရားမဝင် လက်နက်ထုတ်လုပ်မှုများ ပြုလုပ်ခဲ့ခြင်းကြောင့် တပ်မတော်အစိုးရ(စစ်အစိုးရ)မှ တရားခံ ပြေးအဖြစ် ကြေညာခဲ့သည်။


တရားခံပြေး အဖြစ်က ဖုန်ကြားရှင် ဘယ်လို လွတ်မြောက်ခဲ့သလဲ


တပ်မတော်အစိုးရ (စစ်အစိုးရ)မှ ဖုန်ကြားရှင်အား တရားခံပြေးအဖြစ် ကြေညာ၍ ဖမ်းဆီးအရေးယူနိုင်ရေး ဆောင်ရွက်နေစဉ် ၂ဝ၁ဝ အထွေထွေရွေးကောက်ပွဲကို ကျင်းပပေးခဲ့ပြီး ဦးသိန်းစိန်သည် တပ်မတော် ယူ နီဖောင်းကိုချွတ်ကာ အရပ်ဝတ် အဝတ်အစားကို ပြောင်းလဲဝတ်ဆင်ခဲ့ခြင်း နှင့်အတူ ဒီမိုကရေစီအစိုးရတစ်ရပ် ဖွဲ့စည်းခဲ့သည်။ သမ္မတဦးသိန်းစိန်(ငြိမ်း)သည် ၂ဝ၁၁ ခုနှစ် သြဂုတ် ၁၈ ရက်တွင် မြန်မာ နိုင်ငံ၌ လွတ် လပ်ရေးနှင့်အတူ ပါလာသော ပြည်တွင်းစစ်ကို ရပ်တန့်နိုင်ရေး၊ ပြည်တွင်း ငြိမ်းချမ်းရေး ရယူနိုင်ရေးအတွက် တစ်နိုင်ငံလုံးသို့ ငြိမ်းချမ်းရေး ဖိတ်ခေါ်ကမ်းလှမ်းလာခဲ့သည်။ ထိုသို့ ဒီမိုကရေစီအသွင်ပြောင်း၍ ငြိမ်း ချမ်းရေးရရှိရန် ဆောင်ရွက်မည့် သမ္မတဦးသိန်းစိန်(ငြိမ်း)အစိုးရသို့ ၂ဝ၁၁ ခုနှစ် နိုဝင်ဘာ ၁၄ ရက်၌ ဦးစိုင်းလင်း(မိုင်းလားအဖွဲ့- NDAA ဥက္ကဋ္ဌ)က ဖုန်ကြားရှင်အား ဖမ်းဝရမ်းထုတ်ထားခြင်းကို ရုပ်သိမ်းကာ တိုင်း ရင်းသား လူမျိုးပေါင်းစုံထံ ပြန်လည်ဝင်ရောက်နိုင်ရန် နိုင်ငံတော်မှ လက်ခံပေးပါရန် နိုင်ငံတော်သမ္မတ ဦးသိန်းစိန်(ငြိမ်း)ထံသို့ အသနားခံစာတင်ပြလာခဲ့ရာ နိုင်ငံတော်သမ္မတ ဦးသိန်းစိန်(ငြိမ်း)သည် တိုင်းရင်းသား စည်းလုံးညီညွတ်ရေး ရှေးရှု၍ လွတ်ငြိမ်းချမ်းသာခွင့် ပေးခဲ့ရာမှာ တရားခံပြေးအဖြစ်ကနေ ဖုန်ကြားရှင် လွတ်မြောက်လာခဲ့ပြီး မြန်မာနိုင်ငံအတွင်းသို့ အခြေချနေထိုင်ခွင့် ရရှိလာခဲ့သည်။


MNDAA နှင့် ဖုန်ကြားရှင် ဘာလဲ ဘယ်လဲ

နိုင်ငံတော်သမ္မတ ဦးသိန်းစိန်(ငြိမ်း)သည် ဖုန်ကြားရှင်အား တရားခံပြေးအဖြစ်မှ လွတ်ငြိမ်းချမ်းသာခွင့်ပေးခဲ့သည်နှင့် တပြိုင်တည်း ဖုန်ကြားရှင်သည် မြန်မာနိုင်င်ငံသို့ ပြန်လည်ဝင်ရောက်လာနိုင်ရေး ကြိုးစားဆောင် ရွက်လာခဲ့သည်။ ထိုသို့ဆောင်ရွက်ရာမှာ ဖုန်ကြားရှင်သည် ယခင်ကဖျက်သိမ်းခဲ့သော MNDAA ကို ပြန်လည်အသက်သွင်း၍ ၂ဝ၁၅ ခုနှစ် ဖေဖော်ဝါရီ ၉ ရက်တွင် ရှမ်းပြည်နယ်(မြောက်ပိုင်း) ကိုးကန့်ဒေသ၌ တိုက် ခိုက်မှုများ ပြုလုပ်ခဲ့ပြီး သမ္မတဦးသိန်းစိန်(ငြိမ်း)၏ ငြိမ်းချမ်း ရေးလုပ်ငန်းစဉ်မှာ ပါဝင်ခွင့်ရရေး တောင်းဆိုလာခဲ့သည်။ ဖုန်ကြားရှင်သည် MNDAA ကို တအာင်းအဖွဲ့(PSLF/TNLA)၊ က ချင်အဖွဲ့(KIA)၊ မိုင်းလားအဖွဲ့ (NDAA)၊ 'ဝ'အဖွဲ့ UWSA, SSA (ဝမ်ဟိုင်းအဖွဲ့)တို့ဆီမှ လူအင်အားနှင့် လက်နက်အထောက်အပံ့ အကူအညီများဖြင့် တပ်ပေါင်းစု ဖွဲ့ စည်းကာ အင်အားကို တည်ဆောက်လျက်ရှိကြောင်း ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီး မြထွန်းဦးက ဆိုသည်။

 


တိုင်းရင်းသား သွေးစည်းညီညွတ်ရေးတပ်တွင် KIA မှ အင်အား ၃ဝဝ ခန့်ရှိသော တပ်ရင်းတစ်ရင်း၊ UWSA မှ တပ်ရင်း လေးရင်းပါဝင်သော တပ်မဟာတစ်ခုနှင့် ကိုးကန့်အဖွဲ့ ၁ဝဝဝ ခန့်ရှိကြောင်း ၎င်းက မီဒီ ယာများနှင့်တွေ့ဆုံစဉ် ရှင်းလင်းပြောကြားခဲ့ဖူးသည်။ ၂ဝ၁၅ ခုနှစ် ဖေဖော်ဝါရီ ၉ ရက်မှ မတ်လအထိ လောက်ကိုင်ဒေသတွင် ဖြစ်ပွားခဲ့သော MNDAA နှင့် တပ်မတော်တို့၏ တိုက်ပွဲများ၌ ဗိုလ်ချုပ်ကြီး မြထွန်း ဦး ပြောသလို UWSA၊ SSA (ဝမ်ဟိုင်း)၊ မိုင်းလားအဖွဲ့တို့ ပါ၊ မပါ မသိသော်လည်း TNLA, AA, KIA  တို့ ကူညီတိုက်ခိုက် ပေးခဲ့ကြောင်း ကာယကံရှင်များထံမှ သိရသည်။ ညှိနှိုင်းကွပ်ကဲရေးမှူး (ကြည်း၊ ရေ ၊ လေ) ဗိုလ်ချုပ်ကြီးမြထွန်းဦးက ''တပ်ပေါင်းစု တပ်မတော်၏ ရည်ရွယ်ချက်မှာ ကိုးကန့်ဒေသတစ်ခုလုံးအား တိုက်ခိုက်သိမ်းယူသွားရန်နှင့် ၎င်းမှတစ်ဆင့် မြန်မာ-တရုတ်နယ်စပ် မုံးကိုး၊ ဖောင်းဆိုင်မှ မြစ်ကြီးနား ဘက်သို့ ချီတက်တိုက်ခိုက် သိမ်းပိုက်သွားရန်ဖြစ်ကြောင်း ဖော်ထုတ်သိရှိခဲ့ရပါကြောင်း'' ၂ဝ၁၅ ခုနှစ် လောက်ကိုင်ဒေသ ဖြစ်စဉ်အပေါ် မီဒီယာများသို့ ရှင်းလင်းပြစဉ် ထိုသို့ ပြောကြားခဲ့သည်။


လက်ရှိအချိန်တွင် MNDAA အပါအဝင် KIA, TNLA, AA  (မြောက်ပိုင်းမဟာမိတ်အဖွဲ့)သည် ၂ဝ၁၆ ခုနှစ် နိုဝင်ဘာ ၂ဝ ရက်မှ ဒီဇင်ဘာလအထိ ရှမ်း ပြည်နယ်(မြောက်ပိုင်း) မုံးကိုး၊ နမ့်ခမ်း၊ ကွတ်ခိုင်အစပ်၊ ပန် ဆိုင်း(ကြူကုတ်)၊ မူဆယ် ၁ဝ၅ မိုင်ကုန်သွယ်ရေးဇုန်၊ မန်တုံစသည့် ဒေသများတွင် စစ်ဆင်ရေးလှုပ်ရှားကာ တိုက်ခိုက်မှုများ ပြုလုပ်နေပါသည်။ မုံးကိုးရှိ တပ်မတော်ဗျူဟာကုန်းများ ထိန်းချုပ်နိုင်ရေး အပြင်းအထန်တိုက် ပွဲများ ဆင်နွှဲခဲ့သော်လည်း လက်ရှိအချိန်ထိ ထိန်းချုပ်နိုင်ခြင်း မရှိသေးသကဲ့သို့ ကချင်ပြည်နယ်ဘက်မှာလည်း တိုက်ပွဲများ ဖြစ်ပွားလျက်ရှိသည်။ ၂ဝ၁၆ ခုနှစ် နှစ်လယ်ပိုင်းအကျော်တွင် ကချင်ပြည်နယ်ဘက်သို့ အမည် မသိ လက်နက်ကိုင်အဖွဲ့အင်အား ၅ဝဝ ကျော် လာရောက်လှုပ်ရှားမှုများ ရှိနေကြောင်း နိုင်ငံခြားသတင်းဌာနတစ်ခုမှ ဖော်ပြခဲ့ပြီး နောက်ပိုင်းမှာတော့ ထိုအဖွဲ့မှာ MNDAA အဖွဲ့ဖြစ်ကာ တပ်ပေါင်းစုလှုပ်ရှားရန် လာ ရောက်ခဲ့ခြင်းဖြစ်ကြောင်း သိရသည်။ ဖုန်ကြားရှင်သည် စစ်ရေးအရ တပ်ပေါင်းစုအကူအညီဖြင့် MNDAA ကို တည်ဆောက်၍ တန်ခိုးအာဏာကြီးထွားရေး ကြိုးစားဆောင်ရွက်လျက်ရှိပြီး ငြိမ်းချမ်းရေး လုပ်ငန်း စဉ်များတွင် ပါဝင်လာနိုင်ရေးအတွက်ကိုလည်း UNFC အဖွဲ့ဝင်အဖြစ် ဆောင်ရွက်ကာ တပ်မတော် နှင့် အစိုးရမှ အသိအမှတ်ပြုရေး ကြိုးစား ဆောင်ရွက်လျက်ရှိသည်။        

 

ချစ်မင်းထွန်း

#theflowernews


ကိုးကား
-    ထို့ကြောင့် ဤသို့
-    ၂ဝ၁၅ ခုနှစ် လောက်ကိုင်တိုက်ပွဲ အခြေအနေ တပ်မတော်ရှင်းလင်းမှု

Rate this item
(0 votes)
M ဘွယ်

M-Bwel (Assistance Online Editor)

Leave a comment

Make sure you enter all the required information, indicated by an asterisk (*). HTML code is not allowed.

back to top

ADV

 ymg adv 6

FacebookG+TwitterRSS